Xa temos novidades no mural da entrada. Un mural ao que dedicamos os traballos e investigacións do noso proxecto: "REMEXENDO CONCIENCIAS" RECÍCLATE CON SOGAMA.
Aquí vos mostramos unhas poucas fotos sobre o exposto neste recuncho do cole.
Quinta e derradeira etapa do Camiño de Santiago. Saímos dende Pedrouzo con destino Santiago de Compostela. O día non puido estar mellor para camiñar, sen choiva e algo anubrado.
Levamos moi bo ritmo e sobre as 16.00 h. puxemos o pé na Praza do Obradoiro.
Foi unha experiencia moi enriquecedora e emocionante. Facer o Camiño todos xuntos, serviunos para animarnos uns aos outros e para darnos conta que cun pouco de esforzo e sacrificio podemos conseguir o que nos propoñamos. Foron 100 km cheos de vivencias e momentos inesquecibles. Vivimos Galicia e sentímola grazas as súas paisaxes e camiños cheos de beleza.
Grazas a todos e a todas por formar parte deste camiño. E grazas aos voluntarios de Protección Civil por estar aí e axudarnos tanto!!
A semana pasada tamén tivemos outra actuación no auditorio para homenaxear a Mª Victoria Moreno, grazas ao concello do Val do Dubra.
Foi sobre a obra de "Pan con chocolate"
O mércores 16 de Maio, fixemos a seguinte etapa do Camiño de Santiago: Arzúa- Pedrouzo. Foron 19,1 km con un clima moi bo. Fomos algo máis lentos do normal pero acabamos sen ningún incidente. Unha etapa con case ningún monumento histórico que ver pero con moita beleza en canto a paisaxes e natureza.
Hoxe tivemos con nós a Ledicia Costas. Escritora galega que recibiu innumerables premios polos seus libros. Entre eles, soaravos "Escarlatina, a cociñeira defunta", "Esmeraldina, a pequena defunta" ou "A señorita Bubble".
Como non podíamos desaproveitar a ocasión, fixémoslle unha pequena entrevista para coñecela un pouco mellor. Tamén o alumnado de 6º lle tiña preparado un recitado, "Do A ao Z" sobre a súa vida e obra.
Tampouco faltou a sesión de firma de libros.
Moitas grazas Ledicia por acompañarnos nesta semana das Letras!!
Aquí vos deixamos imaxes e un video do acontecido.
Este ano como xa sabedes, as Letras Galegas dedícanselle a María Victoria Moreno, escritora de literatura infantil e xuvenil e profesora de ensinanza Secundaria. Escribiu libros como Mar Adiante, A festa no faiado, Leonardo e os fontaneiros, O cataventos, A Brétema,Eu conto ti cantas,... Libros que temos na biblio para que poidas lelos e disfrutar da súa lectura.
Pouco a pouco irémosvos mostrando todo o que imos facendo nesta semana e nas vindeiras. Como adianto xa vos escribo que hoxe temos unha visita moi especial: Ledicia Costas!!!!!
Namentres, déixovos enlaces para que poidades saber un pouquiño máis de Mª Victoria Moreno. Clica nas imaxes
Aquí vos deixamos un bonito vídeo que mostra todo o traballo feito sobre o proxecto "REMEXENDO CONCIENCIAS"- Recíclate con Sogama. Este curso adentrámonos de cheo no coidado do medio ambiente. Aprendemos tantísimo e cambiamos tantas rutinas que facíamos mal que estamos moi orgullosos de todo o conseguido!! E aínda nos queda por conseguir e aprender xa que este tema dá para moitos cursos!!! Nós seguiremos traballando e esforzándonos porque éste sexa un mundo mellor!!!
Aquí vos mostramos máis fotos do noso xardín vertical. Como vedes pouco a pouco vai cambiando e vámoslle engadindo máis plantas e ata un banquiño para disfrutar deste recuncho tan acolledor. Estades todos invitados a ver o noso recuncho natural!!