Rematamos o curso… pasado por auga!!

 O último día de cole estivo cheo de alegría, risas e moita diversión coa nosa esperada Festa da Auga. Pequenos e grandes compartiron unha xornada inesquecible na que non faltaron os xogos, as carreiras, os chapuzóns e, sobre todo, as ganas de pasalo ben.

Entre pistolas de auga, globos e moitas sorpresas, o patio encheuse de sorrisos e de momentos que quedarán gardados na memoria de todo o alumnado. Foi a mellor maneira de celebrar o esforzo realizado durante todo o curso e de despedirnos antes das vacacións de verán.

Queremos agradecer ás familias, ao profesorado e a toda a comunidade educativa a súa colaboración e implicación ao longo deste ano, facendo posible que cada día no cole sexa unha nova aventura.

Agora toca descansar, gozar do verán, recargar enerxías e vivir novas experiencias.

Graduacións

 As graduacións de 6º de Infantil e de 6º de Educación Primaria regaláronnos un dos momentos máis especiais do curso. Ademais de celebrar o final dunha etapa e o comezo doutra nova, tivemos a oportunidade de mirar cara atrás e revivir moitos dos momentos compartidos ao longo destes anos.

Foi unha celebración moi emotiva, na que puidemos comprobar canto medraron as nosas nenas e os nosos nenos, non só en estatura, senón tamén como persoas. 

Parabéns a todo o alumnado de 6º de Infantil e de 6º de Educación Primaria por este importante paso. Desexámosvos que sigades enchendo de ilusión e aprendizaxes as novas etapas que están por chegar, levando sempre convosco os recordos e os valores construídos ao longo destes anos.

Aquí vos deixamos unha pequena mostra destes momentos inesquecibles.

6º edición do xornal O Picoto

 No noso centro xa está dispoñible unha nova edición de O Picoto, o xornal escolar elaborado polo alumnado. Coincidindo coa celebración do Día das Letras Galegas, presentamos un número cheo de novas, receitas, reportaxes, pasatempos e creacións feitas polos nenos e nenas do cole.

Ao longo destas páxinas, o alumnado convértese en xornalista, redactor e ilustrador, compartindo experiencias, actividades do centro e temas de actualidade desde a súa propia mirada. Este proxecto non só fomenta a creatividade e a expresión escrita, senón tamén o traballo en equipo e o uso da lingua galega como vehículo de comunicación e cultura.

Queremos felicitar a todos os rapaces e rapazas que participaron nesta edición, así como ao profesorado que colaborou na súa elaboración.

Animámosvos a ler O Picoto e a desfrutar deste traballo feito con ilusión e moito esforzo.

ÚLtimo O Picoto 2025-26

Leer más publicaciones en Calaméo

A NOSA VOZ PARA O DÍA DAS LETRAS GALEGAS

 Hai historias que se len… e outras que se escoitan. Este ano, para celebrar o Día das Letras Galegas 2026, o noso alumnado deu un paso máis alá: converteuse en narrador e narradora, levando os contos á radio para enchelos de vida, emoción e identidade.

Ao longo das últimas semanas, no noso estudio de radio, o alumnado mergullouse no mundo da narración oral.  O resultado é unha colección de historias únicas, contadas desde a frescura e a creatividade de quen está descubrindo o poder das palabras.

Esta iniciativa non só busca fomentar a lectura e o uso do galego, senón tamén reivindicar a tradición oral, tan presente na nosa cultura. Porque contar historias sempre foi unha forma de unir xeracións, de transmitir valores e de manter viva a lingua.

Poñede os cascos, subide o volume… e deixade que o galego soe con forza.

Bo Día das Letras Galegas!

O alumnado de 6º desfruta dunha inesquecible experiencia na Granxa Escola Kiriko

 O alumnado de 6º viviu unha fantástica excursión con pernocta na granxa escola Granxa Escola Kiriko, chea de actividades, convivencia e momentos para lembrar.

Primeiro día

Á chegada á granxa, os nenos e nenas merendaron para repoñer forzas antes de comezar unha intensa xornada de diversión. Participaron nun animado partido de pelota canadiense e en diferentes xogos de interior, compartindo risas e traballo en equipo.

Despois do xantar e dun pequeno tempo libre, chegou unha das actividades máis esperadas: unha ruta en canoa polo río, seguida dunha sesión de tiro con arco. Máis tarde, realizaron unha ruta polo monte na que puideron observar distintos animais e coñecer mellor o entorno natural da granxa.

Xa ao serán, tocou tempo para as duchas e a cea antes de continuar coa diversión. O día rematou cun divertido xogo de “retos” e cunha gran festa na discoteca, onde bailaron e cantaron os seus temas favoritos ata caer rendidos.

Segundo día

A mañá comezou cedo cun bo almorzo para cargar enerxía. Despois, visitaron o horto, o composteiro e o invernadoiro, aprendendo moitas curiosidades sobre o coidado do medio ambiente e a agricultura.

Ao longo da mañá tamén tiveron ocasión de ver os animais que lles faltaban da visita anterior e participaron nun divertido karaoke no que demostraron as súas habilidades musicais.

Tras o xantar e un novo tempo libre, realizaron un xogo de pistas por toda a granxa, poñendo a proba o seu enxeño e a capacidade de traballar en equipo. Logo da merenda, chegou o momento de regresar a Bembibre, levando consigo unha chea de experiencias, aprendizaxes e moi bos recordos desta aventura compartida.

Decímoslle NON ao acosos escolar

 No noso centro educativo cremos que a escola debe ser un lugar seguro, onde todas as nenas e nenos se sintan respectados, escoitados e valorados. Por iso, desde as aulas quixemos dar un paso adiante e traballar un tema tan importante como é o acoso escolar.

Como resultado, realizamos un vídeo no que o alumnado expresa o que pensa e sente sobre o bullying. Porque ás veces, as mensaxes máis importantes son tamén as máis sinxelas… e as máis sinceras.

Este vídeo é unha mostra do compromiso dos nosos nenos e nenas cunha convivencia baseada no respecto, na empatía e na axuda mutua.

Invitámosvos a velo, reflexionar e compartir a mensaxe: entre todas e todos podemos construír unha escola mellor.

🎥 Dálle ao play e escoita as súas voces.

Entroido

 Este ano celebramos o Entroido cunha temática moi especial: o mar. O cole encheuse de cor, creatividade e ilusión grazas a uns disfraces espectaculares feitos na casa.

Tivemos polbos simpatiquísimos, chipiróns moi elegantes, medusas brillantes, peixiños de cores, e tamém buzos preparados para explorar o fondo mariño.

O máis bonito foi ver como cada disfraz era único, feito con agarimo, imaxinación e moito traballo en familia. Notouse o esforzo e a dedicación en cada detalle: tentáculos ben traballados, materiais reciclados, luces, pinturas… Un auténtico desfile mariñeiro!

Queremos facer unha felicitación moi especial ás familias.

O resultado foi marabilloso: os nenos e nenas estaban orgullosos dos seus disfraces, felices de poder ensinar o traballo feito en familia e gozaron dun día inesquecible.

Aquí vos deixamos as fotos deste Entroido tan mariñeiro. 🌊📸
Agardamos que as disfrutedes tanto como nós disfrutamos vendo desfilar a nosa pequena gran marea de artistas.

Grazas, familias, por facer escola connosco!

https://photos.app.goo.gl/VxuUaJAjtQLbV9jj8

Mandatos do Meco

 Aquí vos deixamos os mandatos do Meco, relacionado co noso PDI: "Os ciencuenta anos do cole"